კრისტიან ვოლფი ბრუნდება — „ბუღალტერი 2“ (The Accountant 2, 2025) გევინ ო'კონორის კრიმინალური ბოევიკია, პოპულარული ფილმის დიდი ხნის ნანატრი გაგრძელება. როდესაც ვოლფის ძველ ნაცნობს კლავენ და ის კოდირებულ შეტყობინებას — „იპოვე ბუღალტერი“ — ტოვებს, გენიალური ბუღალტერი, რომელსაც ურთულესი პრობლემების გადაჭრის უნიკალური ნიჭი აქვს, იძულებული ხდება საქმის გამოძიება თავად დაიწყოს.
როცა ცხადი ხდება, რომ უფრო რადიკალური ზომებია საჭირო, ვოლფი დახმარებას თავის გაუცხოებულ და უკიდურესად საშიშ ძმას, ბრექსტონს სთხოვს. ბენ აფლეკი და ჯონ ბერნტალი ეკრანზე შესანიშნავ დუეტს ქმნიან, მათ კი ჯ. სიმონსი უერთდება. მძაფრსიუჟეტიანმა თრილერმა IMDb-ზე 6.7 ქულა მოიპოვა.