მამის საეჭვო გარემოებებში გარდაცვალება ორ გაუცხოებულ ნახევარძმას, ჯონისა და ჯეიმზს, წლების შემდეგ კვლავ აერთიანებს. „დამანგრეველი ბრიგადა“ (The Wrecking Crew, 2026) სიმართლის ძიების ისტორიაა, რომლის დროსაც ძმები ისეთ დამარხულ საიდუმლოებებს წააწყდებიან, რომლებმაც შესაძლოა მთელი ოჯახი შეთქმულების ეპიცენტრში მოაქციოს.
ანხელ მანუელ სოტოს კრიმინალური კომედია ორი ქარიზმატული ვარსკვლავის — ჯეისონ მომოასა და დეივ ბაუტისტას — ქიმიაზეა აგებული: მათი მუდმივი კინკლაობა და განსხვავებული ტემპერამენტი ფილმის მთავარი ხიბლია. მათ გვერდით მორენა ბაკარინი და კლას ბანგი ჩნდებიან. მძაფრსიუჟეტიანი სცენები, იუმორი და ოჯახური დრამა აქ ერთმანეთს ორგანულად ერწყმის — IMDb-ზე ფილმს 6.8 ქულა აქვს.