მარველის კინოსამყარო თავის ყველაზე მასშტაბურ შეჯახებას ამზადებს: „შურისმაძიებლები: განკითხვის დღე“ (Avengers: Doomsday, 2026) სამი განსხვავებული სამყაროს გმირებს ერთმანეთს დაახვედრებს და მათ ისეთი ეგზისტენციალური საფრთხის წინაშე დააყენებს, როგორიც აქამდე არასდროს შეხვედრიათ.
ფილმის მთავარი სენსაცია რობერტ დაუნი უმცროსის დაბრუნებაა — ამჯერად ის დოქტორ დუმს ასახიერებს. მას კრის ჰემსვორთი, ენტონი მაკი და კრის ევანსი უერთდებიან, რეჟისორების სავარძელში კი ძმები რუსოები ბრუნდებიან — ისინი, ვინც „უსასრულობის ომი“ და „ფინალი“ შექმნეს. სათავგადასავლო ფანტასტიკური ბლოკბასტერი მულტისამყაროს საგას ახალ, გარდამტეხ ეტაპზე გადაიყვანს.