ეს ამბავი უკუღმა იწყება: სამყარო ნელ-ნელა ინგრევა, ქალაქის ბილბორდებზე კი იდუმალი წარწერა ჩნდება — „მადლობა, ჩაკ, 39 მშვენიერი წლისთვის“. ვინ არის ჩარლზ „ჩაკ“ კრანცი და რატომ უკავშირდება მისი ცხოვრება მთელი სამყაროს ბედს? პასუხი სამ თავად გაშლილ, უჩვეულო კომპოზიციაში იმალება.
„ჩაკის ცხოვრება“ (The Life of Chuck, 2025) მაიკ ფლენეგანის მიერ ეკრანიზებული სტივენ კინგის მოთხრობაა — მოულოდნელად ნათელი, სიცოცხლის სიყვარულით სავსე დრამა ფანტასტიკის ელფერით. ტომ ჰიდლსტონი მთავარ როლში მშვენიერია, მას ჩივეტელ ეჯიოფორი და მარკ ჰემილი უერთდებიან. ტორონტოს კინოფესტივალის მაყურებელთა პრიზის მფლობელი ფილმი IMDb-ზე 7.3 ქულითაა შეფასებული.